India ramah ni 64 chhungin Covid-19 kai Mi 100 aṭangin nuai khatah an pung

Union health ministry-in a tarlan danin, India rama Covid-19 kai zat chu nimin  khan mi nuai khat an tling. India ram aia hri kai tamna ram chu 10 chauh an awm tawh a ni. 

Thawhṭanni khan ram chhung­ah hri kai mi 4,970  awm belhin, mi 134 in an thihpui a ni. Thawhlehni thleng khan hri kai hriat tawh zat hi mi  1,01,139 an tling tawh a, he hri vanga thi hi mi  3,163 an awm tawh  bawk. 

Health ministry data aṭanga a landanin, India ramah Covid-19 kai hi ni 64 chhungin mi 100 aṭangin mi nuai  khatah an pung hman a ni. India rama hri kai zinga 50% hi hmun panga - Mumbai, Delhi,Ahmedabad, Chennai leh Thane-a mi an ni. Hri leng hluarna hmun tam takah hian hri laka invenna atana pawimawh nia sawi, hmaituamna (face mask) vuah leh midang hlata awm, social distancing te chuan zawm an hlawh ṭha lo hle. 

Sorkar chuan test a tam  thei ang ber neih chhoh zel a tum thu sawi mah se, ram dang hri kai tamna nena tehkhin chuan test neih zat hi a la hniam hle. Mi maktaduai khatah mi 1,681 zel test ang an ni a, hetih lai hian Spain ramah chuan mi maktaduai khatah 65,000 zel test an ni, Italy-ah mi maktaduai khatah 41,771; UK-ah 29,224; US-ah 28,482 zel test  an ni a, test rate-ah India chuan ram dangte a la pha lo hle. 

Khawvel pumah coronavirus kai zat chu nimin thleng khan mi 49,09,136 an tling tawh a, an zinga 3,20,434 in an thihpui tawh a ni. 

Union Ministry of Health and Family Welfare chuan lockdown 4.0 chhunga nimin khan office leh hnathawhna hmun bik atana guideline thar a siam chu a tichhuak. 

Ministry in guideline a tih­chhuahah hian office emaw, hnathawhna hmunah emaw Covid-19 kai mi pahnih khat an awm avangin office building leh hnathawhna hmun chu a puma khar kher a ngai lo tih a sawi. Hri kaiin darkar 48 liam ta chhunga a tlawh hmunte chauh chu khar tur a ni, a ti. Hemi rual hian hnathawhna hmun pakhatah hri kai eng emaw zat hmuh an nih erawh chuan building pum chu darkar 48 chhung khar a, damdawi hmangin building pawh kah thianghliam tur a ni a, staff-te pawhin in lam aṭangin hna an thawh chhunzawm hrih dawn a ni.