India-in UN agency tan USD mtd 2 a pe
India chuan Palestine raltlan chhawmdawl hna thawktu United Nations Relief and Works Agency (UNRWA) hnenah US dollar maktaduai 2 a pe a, hei hi an programme hrang hrang, zirna leh hriselna lama an hmalaknaahte an hmang ang.
UNRWA tana sum a pek ṭhin hrim hrim hi India chuan a tipung a, kum 2016 khan kum khatah USD mtd 1.25 a pe ṭhin a, nikum khan USD mtd 5 a pe tawh. Kuminah hian USD mtd 5 bawk pek leh a tiam niin an sawi bawk.
UN agency hian India hnenah lawmthu sawiin a bik takin hripui leng kara sum tam tham tak hmanga an ṭanpui thei chu lawmawm an ti hle. Palestine-a Representative of India (ROI) Sunil Kumar chuan sum hi a hlan a ni.
Palestine raltlan maktaduai 3.1 lai chuan hriselna lama an mamawh dawnna turin UNRWA hi an ring chawt a, heng bakah hian agency chuan kum khatah zirlai 5,26,000 vel lai zirna tur a tumsak bawk.