Union minister hlui leh AAP hruaitu pahnih man an ni

Thawhṭanni khan union minister hlui Yashwant Sinha, Aam Aadmi Party hruaitu Sanjay Singh leh Dilip Pandey-te chu kut hnathawkte an state-a an haw dan chungchangah sorkar laipuiin a ngaihsak ṭha tawk lo nia sawia lungawi lohna an lantir avangin police-ten an man. 

Yashwant Sinha hian an man chung chang hi a twitter-ah sawi chhuakin, kut hnathawktute zingah mahnia kea haw an awm avangin sipaite chuan hruai haw mai se an duh tih an lantir vang a nih thu a sawi.

AAP hruaitu Sanjay Singh chuan ram danga tangkhang, India mite hruai haw danah sorkar chuan ruahmanna fel tak a neih laiin, ram chhunga mi rethei zawk kut hnathawkte an khuaa an haw dan turah sorkar chuan mumal takin thil a kalpui lo a ni, a ti. Hei vang hian sorkar laipui chu mi retheite ngaihthahah a puh bawk. Pandey pawhin sorkar chuan a hmain ram chhungah rel 20,000 vel, passenger mi vaibelchhe 2.3 phur thei a tlantir thu sawiin, hei hi tuna kut hnathawkte hruai hawna atan ruahhman ni rawh se, a ti.

Sorkar laipuiin Covid-19 leng vanga inkhuahkhirhna a kalpui avangin inhlawhfa tan hnathawh mumal theih a ni lo a, an khaw lama haw duh tam tak an awm a ni. Mi ṭhenkhat chuan an haw dan chungchangah hian sorkar chuan ruahmanna a siam fel tawk lo niin an sawi a, kea thui tak tak kala mahni in lama haw an tam bakah, an haw kawnga accident tawh vanga thi pawh an awm nual tawh a ni.