India ram Chief Minister 30 zinga 29-te crorepati an ni : ADR

Association for Democratic Reforms (ADR)-in poll affidavit-te a zirchianna aṭangin, India rama chief minister ṭanglai mi 30 zinga mi 29-te chu mi hausa tawntaw, crorepati an ni.

Chief minister zingah Andhra Pradesh CM Jagan Mohan Reddy chu a hausa ber a, a thil neih hlut zawng hi Rs vbc 510 a tling. West Bengal CM Mamata Banerjee chu CM zingah rethei berin, Rs nuai 15 hu chauh a nei thung.

ADR leh Election Watch (NEW) in zirchianna an neih hi state chief minister 28 leh union territory pahnih, Delhi leh Puducherry chief minister pahnihte an ni. Jammu and Kashmir union territory chuan tunah hian CM an nei rih lo a ni.

CM 30-te hausakna hi chawhrualin mi pakhatin Rs vbc 33.96 hu zel nei ang an ni.

ADR report chuan CM 30 zinga 13 (43%) chu serious criminal case nei lai niin, an thubuai neih zingah hian tualthah, tualthah tum, mi rukbo leh pawikhawihna thlentira puhna thubuaite a tel. Serious criminal case-a non-bailable niin, kum nga chuang lung-in tantir theih an ni tih report chuan a tarlang bawk.

Chief minister hausa zual pathumte chu - Andhra Pradesh CM Jagan Mohan Reddy (Rs vbc 510 chuang), Arunachal Pradesh CM Pema Khandu (Rs vbc 162 chuang) leh Odisha CM Naveen Patnaik (Rs vbc 63 chuang)-te an ni.

CM zinga a rethei zual pathumte chu West Bengal CM Mamata Banerjee (RS nuai 15 chuang), Kerala CM Pinarayi Vijayan (Rs vbc 1 chuang) leh Haryana CM Manohar Lal (Rs vbc 1 chuang) te an ni. Bihar CM Nitish Kumar leh Delhi CM Arvind Kejriwal-te chuan Rs vbc 3 hu an nei bawk.