ED-in BBC India lakah FEMA case ziaklut

Enforcement Directorate (ED) chuan British Broadcasting Corporation (BBC) India lakah Foreign Exchange Management Act (FEMA) hnuaiah dan bawhchhiaa puhna thubuai a ziaklut.

Thubuai hi kar hnih liam ta khan ziaklutin, BBC India-a thawktu paruk chu thu an zawtfiah tawh a, an zingah hian director pakhat pawh a tel niin official-ten an sawi.

ED hian FEMA hnuai­ah company executive-te statement an record bakah, document-te pawh an dil nia sawi a ni. Company-in foreign direct investment (FDI) a bawhchhiat dan an chhui nia sawi a ni bawk.

February thla khan Income Tax Department chuan New Delhi leh Mumbai-a BBC office-te chu transfer pricing rules zawm ṭha lo leh chhiah pek danah fel tawk lo awm nia sawi chungchangah an lo dap tawh bawk. IT official-te hian account book, bank account, cash, stock leh document eng emaw zat an enfiah sak.

Kumin January 17-a BBC-in kum 2002 Gujarat intualvuakna thleng chung­chang leh, he thil thlen laia Gujarat chief minister Narendra Modi inhnamhnawih dante tarlanna, 'India : The Modi Question' a tihchhuah hnuah, Tax Depart­ment leh ED hian BBC India hi an bitum zui ve nghal a ni. Sorkar laipui chuan he documentary hi YouTube leh Twitter aṭangin a lakthlak tir bakah, tihchhuah a khap zui bawk.

BBC documentary tihchhuah leh, India rama BBC office-te dap leh chhui zui an ni hian inzawmna a nei lo niin sorkar lam chuan sawi mah se, eptute chuan BJP sorkar beihna atan an hmang zui nasa hle.