Indian Army-ten LoC-ah Pakistan drone an kapthla
Indian Army chuan Nilaini zan khan Jammu and Kashmir-a India leh Pakistan inrina, Line of Control (LoC)-ah India ram china rawn thlawh luh tir tum Pakistan drone an kapthla tih an sawi.
Defence thupuangtu Lt Col Devender Anand chuan drone hian Pakistan aṭangin LoC rawn pelin, Rajouri district-a Sunderbani sector-a Berri Pattan area a rawn lut tih a sawi. Mahse sipaite chuan Jammu and Kashmir police-te nena thawkduin drone che vel hi lo chhui zui vatin, an kapthla thei ta a ni, a ti.
Sipaite hian drone an kahthlakna hmunah hian AK magazine panga, AK 47 mu 131 leh India pawisa Rs nuai 2 an hmu a ni.
April 9 khan Indian Army-te hian Poonch sector-ah Pakistan aṭanga India rama rawn luh ruk tum mi pakhat kaphlumin, mi dang pahnih an man a ni.
An mi mante kut aṭang hian ruihhlo kg 17 leh Pakistan pawisa tam tham tak bakah document eng emaw zat an man tel bawk. March 31 zanah khan Border Security Force (BSF) chuan Samba-a Ramgarh sector-a international border-ah Pakistan drone an kapthla tawh bawk.
Pakistan lam aṭanga ramri kaltlanga drone a rawn luh fo avangin, nikum October thla khan Indian Army chuan LoC-ah drone rawn lut tur venna turin aqua jammer an lo dah tawh a ni.