NCERT textbook aṭanga Maulana Azad hming paih sawisel

National Council of Educational Research and Training (NCERT)-in Class 11 political science text book a tihchhuahah Maulana Abul Kalam Azam hming paih a nih chu eptu party-te chuan sawiselin, rorellai BJP chu India ram education minister hmasa ber hming paih a nih chhan an zawt.

NCERT Class 11 political science textbook-a 'Indian Constitution at Work' tih thupuia Constituent Assembly-a committee head hrang hrangte tarlanah, Maulana Azad hming hi paih a ni. Hemi hma hian BJP sorkar chuan Azad hminga scholarship siam pawh a lo titawp tawh bawk.

National Congress Party (NCP) thupuangtu Clyde Crasto chuan, "Maulana Azad hi India rama education minister hmasa ber a ni a, hetihlaia BJP kaihhruai sorkar laipuiin kan education system aṭanga a hming a paih hi a vanduaithlak takzet a ni," a ti. Crasto chuan textbook aṭanga Azad hming paih a nih chungchang chu NCERT chuan sawifiah ngei a ṭul tih a sawi. Minority affairs ministry chuan nikum khan minority group zirlaite hnenah kum nga chhung atana scholarship an pekna, Maulana Azad Fellowship a lo titawp tawh tih a sawi bawk.

Communist Party of India (Marxist) hruaitu Sitaram Yechury pawhin school textbook aṭanga Maulana Azad hming paih a ni chu a thinrimthlak hle tih sawiin, phuba lakna atan history tih danglam tum chuan modern India innghahna lungphum a tichhe zawk a ni, tiin a twitter-ah a tarlang ve bawk a ni.

Congress party senior leader, union minister of state for human resource development hlui Shashi Tharoor pawhin NCERT textbook aṭanga Maulana Azad hming paih a nih chungchangah BJP kaihhruai sorkar chu sawiselin, thil zahthlak leh mualphothlak tak a ni, a ti.