Eptu ṭangrual siam tuma hma lakna kalpui zel

Ram chhunga eptu party hrang hrangte chuan kum 2024 Lok Sabha inthlanpuiah rorellai, BJP paithlak a nih theihna tura eptu pawlte ṭanrual dan ngaihtuahin hma an la chhunzawm zel.

National Congress Party (NCP) hruaitu Sharad Pawar chuan Ningani khan Congress party president Mallikarjun Kharge leh senior leader Rahul Gandhi a hmu. Meeting zawha chanchinthar lakhawmtute a kawmnaah, Pawar chuan eptu party-te chu an inlungrual a, an thawhho theih dan tur ngaihtuaha hma lak zel a ṭul thu a sawi.

Ningani vek khan Bihar chief minister, Janata Dal United hruaitu Nitish Kumar pawhin Left party leader Sitaram Yechury leh D Raja bakah, Aam Aadmi Party (AAP) hruaitu Sanjay Singh a hmu bawk. A hma niin AAP convenor leh Delhi chief minister Arvind Kejirwal nen meeting an lo nei tawh bawk a ni.

Sharad Pawar chuan 2024 inthlanpui neih turah party dang tumah thawhpui a tum loh thu lo sawi tawhtu, Trinamool Congress (TMC) hotu Mamata Banerjee pawh an hmin theihna'n theihtawp chhuah a ngai a, ani bakah eptu party dang hruaitute pawh biak zel a ngai tih a sawi.

Rahul Gandhi pawhin eptu ṭangrual siamna tur chu kalpui ṭan a ni a, party dangte pawhin an la rawn zawm zel dawn tih a sawi ve bawk.