Karnataka CM hlui, BJP hruaituin Congress party a zawm

Karnatka chief minister hlui leh BJP hruaitu, Jagadish Shettar chuan Congress party a zawm a, nimin khan Bengaluru-a Congress party office-ah lawmluh a ni a, he hun hi Congress party president Mallikarjun Kharge leh AICC general secretary KC Venugopal-ten an hmanpui.

Jagadish Shettar hi state assembly inthlan lo awm turah party ticket a chan loh avangin BJP hi a chhuahsan a ni.

Kum 67 mi, Lingyat hnam hruaitu Shettar hian Akhil Bharatiya Vidyarthi Parishad (ABVP) aṭangin politics a khel chho a, a hnuah BJP hi zawmin, kum 30 chuang zet a awm hman a ni. Kum 2005-ah Karnataka state BJP president niin, kum 2008-a BJP-in state sorkarna an chan khan Karnataka Vidhan Sabha speaker atan thlan a ni. Kum 2012, July aṭanga May, 2013 khan chief minister a ni bawk.

Kum 2008 state assembly inthlanah khan Shettar hian Hubli-Dharwad Central constituency-ah a khingpui, Congress candidate Mahesh Nalwad chu vote 21,000 chuangin a hneh. He bialah hian kum 1994 aṭang khan MLA atan term ruk thlan tlin a lo ni tawh a ni.

Shettar chuan BJP chhuahsana Congress party a zawm chu mak ti tam tak an awm a rin thu a sawi a, mahse uluk taka a inngaihtuah hnuah Congress hi a zawm tih sawiin, politics lamah bung thar a ṭan dawn tih a sawi. Karnataka-a BJP chu hruaitu tlemtein anmahni hlawkna tur chauh ngaihtuahin an thunun tih a sawi.