Russia Deputy PM Manturov a rawn zin

Russia deputy prime minister Denis Manturov chu ni hnih cham turin nimin khan India ramah a rawn zin.

Manturov hi high-power delegation member 95 in an rawn zui a, an zingah hian first deputy manager of the President of Russia Pavel Mikhailovich Fradkov leh first deputy chairman of Bank of Russia Vladimir Vikotorovich Chistukhin pawh an tel.

Russia Deputy PM hi ram pahnihten trade, culture, science and technology chungchanga meeting an buatsaiha tel tura rawn zin niin, external affairs minister S Jaishankar nen meeting hi an kaihruai ang. Meeting-ah hian Russia rama India-in bungraw thawnluh tihpun dan chungchang an sawi nghal dawn a ni. Manturov hian sumdawng aiawhte pawh a hmu dawn bawk a ni.

Ukraine deputy foreign minister Emine Dzhaparova-i'n India a rawn tlawh hnuah Manturov hi Russia cabinet member rawn zin hmasa ber a ni. Russia defence minister Sergei Shouigu leh foreign minister Sergey Lavrov-te chu SCO ministerial level meeting hmang turin an rawn zin leh dawn bawk.