Congress President-in Caste Census buatsaih turin PM a phut

Congress party president Mallikarjun Kharge chuan prime minister Narendra Modi hnenah lehkha thawnin, caste census buatsaih a phut.

PM hnena lehkha a thawnah, Kharge chuan caste census neih tawh chu tihthar, update a nih loh avangin social justice leh empowerment programme hrang hrang, a bikin OBC tana pawimawh database rintlak a awm lo a ni, a ti. "Indian National Congress-in caste census update kan phut chu ka rawn hrilh nawn leh che a ni. Parliament-ah pawh vawi tam tak kan party hruaitute leh eptu party dang hruaitute pawhin an lo sawilang tawh bawk a ni," tiin a sawi.

Kharge chuan Congress kaihhruai UPA sorarin kum 2011-12 chhunga Socio Economic and Caste Census (SECC) a kalpui chu PM pawh chuan a hriat thu sawilangin, he chhiarpui hian chhungkaw vaibelchhe 25 chuang a huam a ni, a ti. Kum 2014, May thlaa BJP-in central-a sorkarna an chan hnuah, Congress leh party dang MP-te chuan caste data hi tihchhuah turin ngen fo mah se, chhuanlam hrang hrang vangin tun thlengin sorkar chuan a tichhuak lo a ni, a ti.

"Caste census update a awm loh chuan database rintlak a awm dawn lo a ni. Census hi sorkar laipui mawhphurhna a ni," tiin Congress president chuan a sawi. Tihdan phunga kum 10 dana census buatsaih ṭhin pawh kum 2021 kha buatsaih hun a ni tawh a, mahse tun thlengin neih a la ni lo tih a sawi a, census chu a rang thei anga buatsaih a, sorkar chuan a thil ngaihpawimawh zingah caste census chu dah tel tura an phut thu Kharge chuan a sawi bawk.

Pathianni khan Congress hruaitu Rahul Gandhi pawhin PM Modi chu kum 2011 caste-based census chu mipuite hmuh theiha tlangzarh tura phutin, "UPA-in kum 2011-ah caste-based census buatsaihin hetah hian data a awm vek a ni. PM chuan he data hi mipui hmuhah tlagnzarh sela, mipuite chuan OBC, Dalit leh tribal eng zat nge awm tih an hre thei dawn a ni," tiin a sawi.