Mamata Barnerjee-i'n Amit Shah bang turin a phût

West Bengal chief minister leh Trinamool Congress (TMC) hotu, Mamata Banerjee chuan a kaihhruai sorkar paihthlak tumah puhin, union home minister Amit Shah chu bang turin a phût.

Amit Shah hian April 14-a West Bengal-a public meeting a neih ṭumin, mipuite chu kum 2024 Lok Sabha inthlanah BJP tan seat 35 pe turin a ngen a, 'Kum 2025-ah chuan Mamataji sorkar chu a tla tawh dawn a ni," tiin a sawi zui.

Chief Minister chuan Amit Shah thusawi dan chu sawiselin, "Home Minister chuan mipuite thlan chhuah sorkar hi a paihthla dawn tih a sawi. Hetiang zawnga thu a sawi hnuah, Shah hi Home Minister-ah a awm zui reng tur a ni lo a, a bang ngei tur a ni," a ti. Home Minister-in seat a beisei zat a sawite chu chhang let bawkin, BJP chuan kum 2024 inthlanpuiah West Bengal-ah seat nga pawh an la tling lo ang, a ti.

Eptu party hrang hrangte chu inlungrual tura sawmin, Banerjee chuan,"Kan ṭanrual chuan 2024 inthlanpuiah BJP hi an chak zo tawh dawn lo a ni," tiin a sawi zui bawk.

Tun hnaia Jammu and Kashmir governor hlui, Satya Pal Malik-a'n kum 2019-a Pulwama, J&K-a firfiakten sipaite an beihna chungchanga thil awmdan dik tak nia tun hnaia a sawi, he pawikhawihna rapthlak tak thleng chu prime minister Narendra Modi thiam loh nia a sawi chu judge ṭanglai ngei kaihhruaina hnuaia chhui chian a phut thu a sawi bawk. Uttar Pradesh-a Inrinni liam ta zana police-te escort lai renga Atiq Ahmed leh a unaupa kahhlum an nih chungchangah central team-in ṭum eng zat nge UP hi an tlawh tawh tih a zawt bawk. West Bengal-ah inthlan kaihhnawiha buaina chhuakah sorkar laipui chuan central team 151 zet a tirlut tawh a ni, a ti.