NCP Ajit Pawar-a'n BJP a zawm dawn nia thuthang a dik lo tih a sawi

National Congress Party (NCP) leader, Maharashtra deputy chief minister hlui Ajit Pawar chuan BJP a zawm dawn nia thuthang awm chu thu dik lo a nih thu nimin khan sawiin, NCP-ah a awm reng dawn tih a sawi.

Nimin chanchinthar lakhawmtute a kawmnaah, Maharashtra assembly-a leader of opposition Pawar chuan, "Ka chungchanga thuthang awmte chu thu dik lo a ni. NCP-ah ka awm a, he party-ah hian ka awm reng bawk ang," a ti. Media-te chu awmze nei loa thu dik lo thehdarhah a puh let bawk a ni.

Ajit Pawar hian kar liam taa a meeting neih tur a ṭhulh avang leh, BJP leh chief minister Eknath Shinde-te ṭan lam deuha thu a sawi nia an sawi avangin, a chungchangah thuthang eng emaw a awm zui nghal a ni.

Pawar chuan an state-in harsatna hrang hrang an tawh mek, hna nei lo pung zel leh loneitute harsatna chungchang aṭanga mipui rilru lakpenna atan, tum nei ranin ama chungchang thu dik lo hi thehdarh a ni tih a sawi.

NCP hotu lu ber leh Ajit Pawar-a pu (uncle) Sharad Pawar pawhin, Ajit Pawar chungchang report-te chu thu dik lo a nih thu leh, NCP MLA-te meeting a ko tia sawi pawh a dik lo thu a sawi. NCP tan theihtawpin a thawk mek a, hei hi thu dik lo thehdarhtute pawhin hria se a duh thu a sawi bawk.