East India-a khaw lum la ziaawm dawn rih lo

India ramah khaw lumin zual lam a la pan zel a, India Meteorological Department (IMD) chuan India khawchhak lamah chuan ni li chhung vel chu khawlum hi a la ziaawm dawn lo niin a sawi.

West Bengal leh Bihar-ah pawh ni hnih chu khawlum hi a la zual dawn tih sawiin, Northwest India, Central India leh South India-ah pawh ni hnih chhung chu temperature a danglam vak dawn lo a, mahse ni hnih hnuah chuan khaw lum lam hi 2-3 degree celsius velah a tlahniam tawh maithei niin a tarlang.

Thawhṭanni khan Central leh East India-a hmun tam zawkah khaw lum lam hian 40-44 degree Celsius a thleng chho. East India leh Northeast bakah Madhya Pradesh leh Andhra Pradesh tuipui kam, Northwest India-ah chuan ṭum danga khawlum lam, normal temperature aiin 3-5 degree celsius-in an sang hlawm bawk.

Thawhṭanni khan khaw lum lutuk avangin IMD chuan state pathum - West Bengal, Bihar leh Andhra Pradesh-ah orange alert a tichhuak a; Punjab, Haryana, Chandigarh, Delhi, Sikkim leh Odisha-ah heatwave alert a tichhuak bawk a ni.

Maharashtra-ah chuan Pathianni khan pawn lamah 'Maharashtra Bhushan' hun hmannaah, khaw lum lutuk vangin mi 11 an thi. Mi 50 chu damdawi-ina hruai an ngai bawk a, an zinga 24 chu enkawl chhunzawm mek an la ni.