Mihring tam lamah India-in China a lehpel

India ram chuan mihring tam lamah China lehpelin, mihring tamna ber ram a ni ta tih United Nations data tihchhuah chuan a tarlang.

Nimina United Nations Population Fund (UNFPA)-in State of World Population (SOWP) report a tihchhuah chuan, India ram mipui chu tld 1.4288 leh, China mipui chu tld 1.4257 niin a tarlang. Hetih lai hian mihring tamna lam ram pathumna, US erawh chuan ram pahniha cheng zat a la thlau hle a, mi mtd 340 an ni. Data hi kumin February-a information an lakkhawm aṭanga siam a ni.

Kum 1950 aṭanga UN in population data lakhawm a, mihring tamna ram list a tihchhuah hnuah India a san ber ṭum khatna a ni. UN chuan kumin kum laihawl hian khawvel pumah mihring awm zat chu tld 8.045 a tling chho dawn niin a chhut bawk.

Population expert-te chuan tun thla chhungin India hian mihring tam lamah China a lehpel thei dawn niin an lo chhut tawh a, mahse a ni tak erawh chu an sawilang lo.

Khawvel puma mihring awm zinga hmun thuma ṭhena hmun khata aia tam chu India leh China-ah hian an cheng a, mahse ram pahnihah hian mihring punna hi a muang chho ve zel a ni.

India ramah kum khata mihring punna hi kum 2011 aṭang khan chawhrualin 1.2% vel a ni. Chhiarpui neih hnuhnung ber chu kum 2011 kumah khan niin, kum 10 dana neih ṭhin ni mah se kum 2021 khan Covid hri leng vangin chhiarpui neih tur hi tihkhawtlai a ni.

India ram mipui zinga hmun lia ṭhena hmun khat chu kum 14 hnuai lam an ni tih UN data chuan a tarlang bawk. Hnathawk rual, working group tia sawi kum 15-64 inkar chu 68% awmin, kum 65 chunglam 7% an awm bawk. Hetih lai hian China ramah chuan an ram mipui zinga kum 65 chunglam 14% an awm a, mi maktaduai 200 dawn an tling a ni.

Agency hrang hrangte chuan India ram mipui awm zat hian pun lam a la pan chho zel dawn a, a peak a thlen hun, mi tld 1.65 an tlin hnuah a tlahniam ṭan dawn niin an chhut.