Congress-in Pulwama inbeihna thleng chungchangah White Paper phût

Congress party chuan kum 2019-a Jammu and Kashmir-a Pulwama hmuna firfiakten Indian Army an beih chungchangah BJP kaihhruai sorkar laipui chu report kimchang pe turin an phût.

Pulwama inbeihna thlen laia Jammu and Kashmir governor Satya Pal Malik chuan tun hnaiah he thil thlen laia thil awmdan sawichhuakin, Central Reserve Police Force (CRPF)-te hian an kalna tur aircraft pe tura an dilna chu sorkar lam hian a phalsak loh avangin kawngpuiah motor-a an kal a ngai a, hei hi firfiakte tan pawh beih an awlsam phah niin a sawi. He pawikhawihna thleng hi intelligence lam fel loh vang leh, prime minister Narendra Modi thiam loh a ni ti zawngin a sawi a ni.

J&K Governor hlui thusawi chungchangah All India Congress Committee’s Delhi in-charge Shaktisinh Gohil, Col (retd.) Rohit Chaudhry leh Wing Commander (retd.) Anuma Acharya-te chuan joint press conference neiin, February 2019-a firfiakte beihna avanga CRFP sipai 40 thih dan chungchang PM Modi kaihhruai sorkar laipui chu zawhna hrang hrang an zawt. Sorkar chu intelligence lam thil felhlel awm leh, sipaite thlawhtheihna hmanga hruai an nih loh chungchangahte White Paper pe tura an phut thu an sawi.

Gohil chuan kum 2019-a thil thleng chungchangah hian an party chuan political statement engmah an siam lo a, mahse tun hnaiah J&K Governor hluiin thil awmdan a rawn sawichhuah a, sipai hotu hlui general (retd) Shankar Roychowdhury pawhin ngaihtuah zui a ṭul thu a sawi takah chuan an rawn sawichhuak ve leh tih a sawi.

Indian Youth Congress member-te chuan Malik-a thusawi chungchangah, sorkar laipui chu thil thlen dan dik tak sawi tura phutin nawrh an lo huaihawt bawk.