Rahul Gandhi-a'n thiam loh chantir a nihna 'stay' a dilna hnawlsak
Gujarat-a Surat sessions court chuan Congress party hruaitu, Rahul Gandhi-a'n defamation case-a thiam loh chantir a nihna 'stay' rih tura a ngenna chu nimin khan a hnawlsak.
Kum 2019 election rally-naa 'Modi surname' chungchanga a thusawi avangin Rahul Gandhi lakah Gujarat BJP MLA Purnesh Modi-a'n thubuai a thehluhah, March 23 khan Surat court chuan Gandhi hi thiam loh chantirin kum hnih jail tang turin a hrem a ni. Court hian hremna pek chungchanga hi Gandhi hian a appeal a phalsak bawk. Hetih lai hian hremna tihchhuah a nih hnu lawkah Lok Sabha chuan Gandhi hi Parliament member a nihna a hlihsak zui ve nghal bawk. Appeal phalsak a ni leh, a appeal hun pawh nghak hma loa sorkarin rang taka Parliament member a nihna a hlihsak nghal mai hi eptu party hrang hrang chuan na takin an sawisel zui a ni.
Sessions court hian ahmain Gandhi-a'n bail a dilna phalsakin, kum hnih tang tura hremna pek pawh tihkhawtlai alo remtih sak tawh a ni.
Court-in Rahul Gandhi ngenna hi a pawmsak chuan MP aṭanga ban a nihna hi sut leh theih a ni dawn a, mahse a ngenna a hnawlsak tak avangin Rahul Gandhi hi Parliament member-ah dah kir leh theih a ni rih dawn lo.
Congress party chuan Guarjat court-in Gandhi dilna hi hnawlsak mah se, dan hmangin tihtheih dang hrang hrang an la dap chhunzawm zel dawn tih an sawi. Vawiin hian Gandhi hian Gujarat High Court-ah ngenna hi thlen leh a tum a ni.