Kerala-in SC-ah CAA khinna thehlut hmasa ber
India constitution Article 131 tlawhchhanin, Kerala state chuan India ram court sang ber, Supreme Court-ah Citizenship (Amendment) Act (CAA) khinna chu Thawhlehnni khan a thehlut.
Kerala state hi India ram state zinga SC-a CAA khinna thehlut hmasa ber a ni. Khinna an thehluhah hian CAA hian India constitution-a Article 14-a "right to equality", Article 21-a "right to life" leh Article 25-a "freedom to practice religion"-te a kalh thu tarlan a ni.
CAA hnuaiah hian India ram ṭhenawm Pakistan, Afghanistan leh Bangladesh aṭanga Hindu, Sikh, Buddhist, Jain, Parsi leh Kristian raltlante chu India khua leh tui nihna pek theih a nih laiin, ṭhenawm ram Sri Lanka leh Nepal
aṭanga minority lo lutte chu a huam ve lo a, Hindu tamna ram chauh a huam avangin Kerala state chuan a hriat thiam loh thu CAA khinna an thehluh an hian a tarlang. Supreme Court-ah hian CAA khinna 60 chuang a lut tawh a, khinna thehluttute hi mimal, pawl leh political party hrang hrangte an ni. January 22 hian SC chuan CAA chungchang hi a ngaihtuah dawn a ni.
Tunhnai lawk khan Kerala chief minister Pinarayi Vijayan chuan Citizenship Amendment Act (CAA) 2019 duh lohnaa thurualpui tura sawmna lehkha state 11 chief minister-te hnenah a lo thawn tawh a ni. Kerala state assembly ṭhukhawm chuan CAA 2019 duh lohna resolution chu an pass tawh bawk.