India ramah Covid-19 kai nuai 19 tling tawh

Ministry of Health and Family Welfare chuan nimina report a tihchhuahah darkar 24 chhung hri kai hmuh chhuah mi 52,509 an awm leh tih tarlangin ram chhung hmun hrang hrangah hri kai mi 19,08,254 an awm tawh a ni.

Hri kai an pun chak ang bawk hian enkawl dam pawh an pung chak hle a, dakar 24 chhunga dam puna leh hri kai thar zat hi intluk ṭepin nimin khan mi 51,706 chu dama puan an ni. Hri kai tawh enkawl dam mi 12,82,215 an awm tawh a, hri kai mek 5,86,244 la awmin enkawl dam tawh rate hi 67.19% lai a ni tawh.

Nimin khan mi 857 an thi leh tih sorkar thuchhuah tarlangin hri vanga thi mi 39,795 an awm tawh a, thihpui tawh rate hi 2.08% a ni bawk. 

Indian Council of Medical Research (ICMR) chuan nimina report an tihchhuahah ni khatah sample 6,19,652 an enfiah tih a tarlang a, hri len ṭantirh aṭanga nimin thleng khan sample 2,14,84,402 an enfiah tawh a ni.

Ramchhung hmun hrang hrangah Covid-19 sample test-na laboratory 1366 lai a awm tawh a, chung zinga 920 chu sorkar laboratory niin 446 chu private laboratory a ni thung. 

India rama hri kai tamna ber State/UT Maharashtra-ah chuan hri kai 4,57,956 an awm tling tawh a, mahse heng zinga 2,99,356 lai hi enkawl dam tawhin 16,142-in an thihpui tawh a, hri kai mek 1,42,458 an la awm. 

Hriin a nghawng nat ber dawttu state Tamil Nadu-ah chuan hri kai mi 2,68,285 awm tawhin 2,08,784 chu an dam leh tawh a, mi 4,349 an thi tawh bawk. Andhra Pradesh-ah chuan hri kai 1,76,333 an awm tawh a, 95,625 an dam tawh laiin 1,604 an thi tawh a ni. 

Lakshadweep-ah case an la hmu lo chhunzawm zel a, Lakshadweep chiah hi India rama case awm lohna a ni tawh a, Mizoram leh Lakshadweep-ah chiah hian Covid-19 vanga thi an la awm lo bawk. 

World Health Organisation (WHO) Chief Scientist Soumya Swaminathan chuan India ram puma test rate chu ram eng emaw zat aiin a hniam zawk tih sawiin  Germany, Taiwan, South Korea, Japan leh United States-ahte chuan test rate hi a sang hle tih a sawi.

Hemi a nih avang hian public health department tin chuan benchmark an neih a ngai tih leh mi nuai khat zelah eng zat nge kan enfiah a, test positivity rate engzat nge tih hriat chian a pawimawh thu a sawi. Test tam tak kalpui a nih loh chuan, hri do chu 'hmai tuam chunga mei ṭhelh tum ang' a ni, a ti. 

Government laboratory    : 920

Private laboratory    : 446

- Real-Time RT PCR hmanna    : 696 (Govt: 421 + Private 275)

- TrueNat hmanna    : 561 (Govt: 467 + Private: 94)

- CBNAAT hmanna    : 109 (Govt: 32 + Private: 77)

Total No. of Labs    : 1366