School uniform leh lehkhabu man tihto vangin Delhi sorkarin private school 12 show-cause notice pe
Delhi sorkar chuan Delhi khawpuia private school 12-te chu uniform leh lehkhabu man an tihto avangin show-cause notice a pe a, school dang paruk chu chhui zui tura tih a ni bawk.
School naupang nu leh paten complaint an thehluh hnuah hma an la zui nghal tih Delhi sorkar thuchhuah chuan a tarlang.
Delhi education minister Atishi chuan show-cause notice pek, school 12-te hi an chhanna leh insawifiah dan a lungawi thlak loh chuan an lakah na takin action lak zui a ni dawn tih a sawi. "Lekhabu leh uniform-te manto takin an leitir tih nu leh pate'n an sawi hnuah show-cause notice hi pek an ni. Education department-in lehkha leh uniform chungchanga kaihhruaina a siam zawm lo school-te chu Delhi School Education Act 1973 hnuaiah na takin an chungah action lak zel a ni ang," a ti.
AAP minister hian April 7 khan private school ṭhenkhat-in dawr thlan bik neiin, heng dawrah hian lehkhabu leh uniform-te chu zirlaite hnenah manto takin an leitir tih hriat a nih thu sawiin, education department hnenah pawh heng school lakah hian action la turin a lo hrilh tawh bawk.
Delhi education department-in kaihhruaina a siamah, private school-te chuan an website-ah academic session ṭan hmain, nu leh pate hrilhhriatna atan class tin tana lehkhabu leh zirna hmanraw dang mamawh list chu dahlang vek turin a ti a ni. Hei bakah lehkhabu leh uniform lei theihna tur, school hnaivaia dawr panga tal hming leh an phone number-te pawh website-ah dah tel vek turin a ti bawk. Nu leh pate hian heng item-te hi khawi dawr aṭang pawhin an lei thei tur a ni a, school chuan a lei theihna tur dawr thlan bik a nei tur a ni lo, a ti bawk. Hei bakah private school-te chu kum thum chhungin an school uniform rawng, design leh thil dang dah telte chu an tidanglam thei lo tih kaihhruaina dan siam chuan a tarlang bawk a ni.