Ladakh chungchang thlirlet

Tunhnaia Ladakh-a China leh India sipai inkara thil thleng chungchang thlir letna nimin khan neih a ni a, he hunah hian defence minister Rajnath Singh, external affairs minister S Jaishankar, national security advisor Ajit Doval leh army chief Gen MM Naravane te an tel.

Thla thum liam ta aṭang khan Ladakh huam chhungah China sipai chetna avangin buaina lian tham em em lo a chhuak neuh neuh a, heng buaina punlun zelah thi leh hliam an awm tak avangin India leh China inkar chu a ṭha lo chho hle a, hei vang hian India chuan China nen inrina Line of Actual Control (LAC)-a sipaite chu inralring reng turin a ti. 

Pathianni khan ram pahnih sipaite hian inbiakna vawi ngana an nei leh a, he hunah hian Pangong Tso leh Ladakh hmarchhak lam hmun ṭhenkhata sipai dah chu tihtlem a nih theih nan hmalak zel dan tur an sawiho. June 6 khan ram pahnih sipaite hian inbiakna hmasa ber an nei a, June 22, June 30, July 14 khan an nei leh bawk a, Pathianni khan a vawi ngana atan inbiakna hi an nei leh a ni.