Covid-19 vaccine enchhinna phase 2 kalpui dawn

Covid-19 vaccine chi hnih chu Phase 1-a clinical trial neih zawh tawh a ni a, Phase 2 neih leh tum mek a nih thu Indian Council of Medical Research (ICMR) director General Balram Bhargava chuan a sawi.

"Tun dinhmunah chuan Covid-19 vaccine chi thum enchhinna chu clinic hrang hrangah neih mek a ni a, chi khat hi Bharat Biotech siam niin he vaccine hi inactivated virus vaccine a ni.

He vaccine hi hmun 11-ah Phase 1 clinical trial neih zawh tawh a ni a, phase 2 neih leh tura kalpui mek a ni. Phase 1 leh 2-a enchhinna hi a him tawk tura ngaih a ni," tiin Bhargava chuan chanchinbu mite a kawmnaah a sawi. Zydus Cadila siam Covid-19 DNA vaccine chu clinical trial Phase -1 neih zawh tawh a ni a, hei pawh hi hmun 11-ah neih a ni. Phase 2 nei turin ruahmanna kalpui leh mek a ni bawk. Nimin khan Pune-a Serum Institute of India siam Recombinant Oxford vaccine chu Phase 2 leh 3 clinical trial neih pui turin ICMR chuan a pawm leh bawk. 

Khawvel pumah Covid-19 vaccine chi hrang hrang 141 enchhinna neih mek a ni a, India pawh hemi kawngah hian nasa taka ṭan a lak mek thu Bhargava chuan a sawi a, India rama Covid-19 vaccine siam chhuak tuma hmalatu ber hi Bharat Biotech an ni a, anni hian ICMR leh Zydus Cadila Ltd an thawhpui bawk.