Firfiakten Indian Army convoy an beihnaah sipai 5 an thi

Jammu and Kashmir-a Poonch-ah Ningani khan firfiakten Indian Army convoy an ambush a, sipai panga an thi a, pakhatin hliam na tak a tuar. Hei hi Poonch-Rajouri area-a firfiakte beihna vanga sipai thihna a thlen ṭum lina a ni.

Firfiakten an lo beihna hmun hi Line of Conrol (LoC)-a Bhimber Gali aṭanga km 7 vela hla, ramhnuaiah a ni. Sipaite hi helai bialah hian Pakistan firfiakte an awm tih thu an dawn avangin beihpui thlak turin an kal a, firfiakte hian ramhnuaiah lo changin an lo bei ta a ni.

J&K police-te chuan Rashtriya Rifles sipaite chuanna truck chu firfiakte hian rocket-propelled grenade leh assault rifle hmangin an lo bei tih an sawi. Sipaite chuanna truck hi a kang a, RPG-a an kah vanga kang nge, sipaite'n an kahhlum hnuah firfiakte hian an hal tih erawh hriat chian a la ni lo.

Inbeihna thlenna hmun leh a chhehvelah hian firfiakte zawngin beihpui thlak zui nghal a, drone leh ui fingte hman tel an ni. J&K senior official chuan Sringary-ah May thla khan G20 event a awm dawn a, hei vang hian Pakistan lam chuan palai kal turte tihṭhaihna atan ruahman lawk vekin he pawikhawihna hi a thlen a ni, a ti.

Jammu and Kashmir lieutenant governor Manoj Sinha chuan sipai huaisente thihna chuan a ti na takzet tih sawiin, "Ram tana an hnathawhte hriatreng a ni ang," tiin thi chhungte a tawrhpui thu a sawi.

Political party hrang hrang pawhin Poonch-a sipaite beihna thleng chu an dem thu sawiin, Ningani zan khan Vishwa Hindu Parishad (VHP) leh Baijrang Dal chuan Jammu khawpuia Tawi bridge-ah pungkhawmin Pakistan demna thute an aupui a ni.

Sipaite beitu firfiakte hi eng pawl nge tih chiah hriatchian la ni lo mah se, Pakistan-a hmunpui nei Lashkar-e-Taiba (LeT) te nia rin an ni.