Covid hri kai mek 66,170 an awm

Union health ministry data tihchhuah tharah, nimin khan India ramah Covid-19 hri kai mek, active case chu mi 66,1790 an tling tawh.

Ningani khan ram pumah hri kai hmuh chhuah thar mi 11,692 awm belh lehin, hri kai hmuh chhuah hi Nilaini aiin 7% in an tlem zawk. Ningani vek khan hripui vang hian mi 28 an thi a, nikum September thla hnua ni khata Covid-19 vanga thi an tam ber ni a ni. Thi zinga mi paruk chu Delhi-a mi niin, Uttar Pradesh leh Maharashtra-ah hripui thihpui hi mi pali vel an awm bawk.

Hri kai hmuh tawh hi mi 4,48,69,684 an tling tawh a, active case hi hri kai aṭanga 0.15% niin thihpui 1.18% an ni.

March thla aṭang khan ram chhungah hri kai hi an pung chho chak leh hle a, sorkar data tihchhuahah daily positivity rate hi 5% a kai tawh a ni. Kerala, Delhi leh Maharashtra-te chu hri kai pung an tam lehna state an ni.

Defence minister Rajnath Singh chu Ningani khan Covid-19 hri a kai tih hmuh chhuah a ni a, inah inenkawlin ngaihtuahawm a ni lo tih ministry thuchhuah chuan a tarlang. Mahse hri a kai avang hian Air Force Commanders' Conference-a a tel tur pawh a ṭhulh a ni.