2002 Godhra rel hal thubuaia thiam loh chantir mi 8-te bail dilna Supreme Court-in a phalsak
Supreme Court chuan kum 2002-a Godhra intualvuakna thlen ṭuma rel pindan haltu, damchhung tang tura hrem mi pariatte bail dilna chu nimin khan a phalsak. He case veka thiam loh chantir midang palite bail dilna erawh a lo hnawlsak tawh thung.
Chief justice of India DY Chandrachuh kaihhruai bench chuan bail dilna hi ngaihtuahin, thiam loh chantir an nih hnuah kum 17 lung-in an tan tawh vangin, an dilna hi a phalsak ta a ni.
Supreme Court hian Thawhṭanni khan Godhra intualvuakna thleng chungchangah trial court-in thi tura an chungthu a remsak, mahse a hnuah Gujarat High Court-in dam chhung tang tura hremna tihnepsak mi palite bail dilna erawh a hnawlsak thung. He intualvuakna thleng kaihhnawihah hian mi 11 chu thi tura hremna pein, mi 20 chu dam chhung tang turin a hrem a ni.
Kum 2002, February 27 khan Gujarat-a Godhra Railway Station-ah Sabarmati Express pindan ṭhenkhat chu hal niin, mi 58 in nunna an chan phah a ni. He pawikhawihna thleng vang hian intualvuakna nasa tak a thleng zui a, kum 2011 khan local court chuan pawikhawihna thlenna inhnamhnawih nia puh zinga mi 31 chu thiam loh a chantir a, mi 63-te erawh thiam a chantir thung.
Gujarat High Court chuan trial court thutlukna siam hi pawmin, thiam loh chantir zinga thi tura hremna pekte erawh chu damchhung tang turin a tihnepsak thung.