Rahul Gandhi-a'n a bungalow chhuahsan

Congress party hruaitu, Rahul Gandhi chuan central Delhi-a a official residence, kum 2005 aṭanga a lo luah tawh, 12, Tughlak Lane bungalow chu chhuahsan tura hriattir a nih angin Inrinni khan a chhuahsan ta.

Gujarat-a Surat court-in 'Modi surname' chungchanga defamation case-ah thiam loh chantir a, kum hnih tang tura a hrem a nih tukah Rahul Gandhi hi Lok Sabha MP a nihna chu hlih sak a ni zui nghal a ni. Court hian appeal theihna hun ni 30 chhung a pe a, mahse a appeal-na hi kar liam ta Zirtawpni khan court chuan a hnawlsak leh a, hei vang hian MP-ah a dah leh theih dawn rih lo a, sorkar bungalow a luah hi a chhuahsan a ngai ta a ni.

BJP MP, CR Patil kaihhruai, Lok Sabha Housing Committee chuan Lok Sabha MP a nihna hlihsak a nih hnuah Rahul Gandhi hi hriattirna pe nghalin, April 22 hma ngeia a bungalow hi chhuahsan turin a ti. MP aṭanga bante hi sorkar bungalow-ah hian an awm zui thei lo a, an official residence chhuahsan tur hian thla khat hun pek an ni ṭhin. Congress party hruaitute chuan dan anga kalpui angin insawi mah se, Rahul Gandhi chunga an chet dan hi BJP kaihhruai sorkar laipuiin politics lama phuba a lakna a ni, an ti.

Rahul Gandhi chuan, "India ram mipuite chuan he in hi kum 19 chhung ka chenna turin min pe a, lawmthu ka hrilh a ni. Ka chunga thil thleng hi thudik tak ka sawichhuah vang a ni. Thudik sawi vang a nih chuan eng pawh chan leh tawrh ka inhuam reng a ni," tiin, a nu Sonia Gandhi chenna, 10 Janpath-ah a awm ve rih dawn tih a sawi. Gandhi hian Surat sessions court thutlukna hi Gujarat High Court-ah appeal leh a tum a ni.