Kum 2023 chhungin India mi mtd 1 chuang US-in visa pek hman tum

US assistant secretary of state for south and central Asia, Donald Lu chuan US sorkar chuan kumin chhungin India mi maktaduai khat chuang hnenah visa pek hman a tum tih a sawi a, visa nghah chhung rei lutuk leh, tihkhawtlai tam tak awm ṭhin pawh chinfel dan an ngaihtuah mek tih a sawi.

Donald Lu chuan work visa - H-1B leh L visa-te chu an dah pawimawh hmasak thu a sawi a, heng work visa diltu tam ber hi IT professional-te an ni. US president Joe Biden kaihhruai sorkar chuan kumin nipuiah India mi student visa dilte dilna ho pawh ngaihtuah hman vek a tum a ni, a ti. US-a international student zingah India aṭanga kal hi a tam ber dawttu an tling pha tawh a ni.

India aṭanga a ṭum khatna atana US visa diltu zingah, B1(business) leh B2 (tourist) hnuaia dilte chuan an nghah rei a ngai ṭhin hle. Lu chuan theihtawpa hma an lak hnuah work visa dilte hi ni 60 hmaa chinfel sakte an ni thei tawh tih sawiin, America leh India economy tana pawimawh a nih avangin work visa chu an dah pawimawh tih a sawi.