Poonch-a sipaite beihna thleng chungchangah mi 40 chuang thu zawhfiah tura hren an ni tawh

Jammu and Kashmir-a Poonch district-a firfiakten sipai chuanna motor bei a, sipai panga an thih hnuah he pawikhawihna thlenga inhnamhnawihte zawn hna ngawrh taka thawh chhunzawm zel a ni. Official-te chuan thu zawhfiah turin mi 40 chuang hren a ni tawh tih an sawi.

Kar liam ta Ningani khan Poonch district-a Bata-Doriya area-ah firfiakten sipaite chuanna motor hi beiin motor hi a kang a, sipai panga an thih bakah pakhatin hliam na tak a tuar a ni. Pawihkhawihtute hi ngawrh taka zawn nghal an ni a, Bata-Doriya area leh a chhehvel hi dap mek a ni.

Firfiakte hian sipaite chuanna truck hi Bhimber Gali-Poonch road-ah culvert hnuaiah biruin an lo chang nia sawi a ni. An zinga sniper chuan Army truck hma lam hi lo kapin, firfiak dangte chuan sir lam aṭangin silai leh grenade hmangin an lo bei zui nghal a, sipaite hian beih letna hun an nei hman lo nia hriat a ni. Official chuan, "Firfiakte hian steel core bullet an hmang a, an tlanchhiat hmain sipaite silai leh a mu an laksak zui bawk," tiin a sawi. Sipaite chuanna motor-ah hian silai mu 50 chuangin a kah fuhna hmuh a ni.

Indian Army Northern Commander Lt. Gen Upendra Dwivedi chuan pawikhawihtute man chhuah ngei tumin theihtawpin hma a la mek tih a sawi a, inbeihna thlenna hmun hi National Security Guard (NSG) leh National Investigation Agency (NIA)-te pawhin an tlawh tawh bawk.

Pathianni khan Kishtwar-ah firfiakte beihna avanga sipai thite sunna leh hriatrengna hun, candle light march neih a ni.