BCI-in anpui inneih chungchang Parliament kutah dah turin SC ngen

Bar Council of India (BCI) chuan Pathianni khan mahni anpui inneih, same-sex marriage phalna ngen chungchang chu dan siamtu lam, Parliament kuta dah mai turin Supreme Court an ngen.

Supreme Court hian mahni anpui inneih phalsak tura ngenna thehlutte chu a ngaihtuah a, hetih lai hian sorkar laipui chuan mahni anpui inneih phalna siam hi a dodal thung.

BCI chuan, "Ram chhung mipui 99.9% chuan India rama mahni anpui inneih phalsak hi an duh lo a ni. Anpui inneih chungchanga petition thehlutte ṭan lama Supreme Court-in thultukna a siam a nih chuan, mipui tam berin India culture leh sakhaw innghahna kalhah an ngai dawn," a ti. Supreme Court chu ram mipui tam zawkte duhdante ngaihven a, zahsak tura an duh thu an thuchhuahah an tarlang.

Chief justice of India DY Chandrachud kaihhruai judge panga awmna, Supreme Court bench chuan mahni anpui inneih phalsak tura ngenna, petition eng emaw zat lut chu a ngaihtuah mek a ni. Hetih lai hian sorkar laipui aiawhtu, solicitor general Tushar Metha chuan he thil hi Court ni loin, legislature lam ngaihtuah tur zawk a ni, a ti.