Nitish Kumar-a'n Mamata Banerjee leh Akhilesh Yadav a hmu

Kum 2024 Lok Sabha inthlanpui neih tura eptu ṭangrual pawl siam tuma hma lakna kal zelah, Bihar chief minister Nitish Kumar chuan nimin khan West Bengal chief minister Mamata Banerjee leh Uttar Pradesh chief miniter hlui Akhilesh Yadav-te a hmu.

Janata Dal United (JDU) hruaitu, Nitish Kumar leh Trinamool Congress (TMC) hruaitu Mamata Banerjee-te hi Kolkota-a state secretariat, Nabanna-a Banerjee office-ah an inhmu. 2024 Lok Sabha inthlanpui neih turah BJP beih let dan turte an sawidun nia sawi a ni. Banerjee hian thla hmasa khan Akhilesh Yadav leh, Odisha chief minister Naveen Patnaik-te a lo hmu tawh bawk.

Kumar hian nimin vek khan Lucknow-ah UP CM hlui leh Samajwadi Party (SP) hruaitu Akhilesh Yadav a hmu nghal bawk.

Inthlanpui lo awm tura BJP paihthlak a nih theihna atan eptute an ṭanho theihna turin hma a la dawn tih Nitish Kumar hian a lo sawi tawh a, ram pumah campaign neih a tumthu a sawi a ni. New Delhi-ah Congress party president Mallikarjun Kharge leh MP hlui Rahul Gandhi-te pawh a lo hmu tawh a ni. Hei hi eptu ṭangrual pawl dinna tura bul ṭanna pawimawh tak nia ngaih a ni. Hemi ṭuma an meeting-ah hian Bihar deputy chief minister, Rashtriya Janata Dal (RJD) hotu Tejashwi Yadav pawh a tel a ni.

Kumar hian thla thar aṭangin regional party hruaitu hrang hrangte kawm kual a tum bawk.