Khaihlum tur zinga miin President hnenah ngaidam dilna thehlut
Kum 2012-a Nirbhaya pawngsual rawntute zinga mi Mukesh Singh (kum 32) chuan Thawhlehni khan president Ram Nath Kovind hnenah ngaihdam dilna (mercy petition) a thehlut.
Mercy petition a thehluh bakah hian thi tura tih a ni chu Delhi High Court hnenah nuai bo sak turin ngenna a siam bawk. Delhi High Court hian nimin khan a ngaihtuah a, he thu buatsaih lai hian chanchin hriat hman a ni lo.
Mukesh Singh leh thi tura an tih tho Vinay Sharma (26)-te hian Thawhlehni khan Supreme Court-ah curative petition an thehlut a, SC hian a hnawlsak a ni.
Akshay Kumar Singh (31) leh Pawan Gupta (25)-te hian curative petition an thehluh ve loh avangin zawhna tam tak a awm a, mahse an lawyer chuan an thehlut vat dawn tih a sawi. Kum 2012 December 12-a medical zirlai, kum 23 mi Nirbhaya (Jyoti Singh) pawngsual rawntu mi paruk zinga pali te chu January 22 zing dar 7 hian Delhi Tihar Jail-a khaihlum turin Delhi court chuan kar kal ta Thawhlehni khan thutlukna a siam a ni.
Curative petition hi Supreme court-in thiam loh a chan tir hnua, thiam loh chang tawhte'n a tawp nana court-a an thu buai ennawn ṭhat lehna tura an dilna a ni.