Mi vbc 100 chuangin 'Mann Ki Baat' vawi khat tal ngaithla tawh

Prime minister Narendra Modi-a'n thla tina radio programme a neih ṭhin, 'Mann ki Baat' chu mi vaibelchhe 100 chuangin vawi khat tal an ngaithla tawh a, he programme regular taka ngaithla ṭhin chu vaibelchhe 23 dawn an tling bawk niin IIM-Rohtak-in zirchianna a neihah a tarlang.

Mann ki Baat chungchang zirchianna, The Listerner Feedback an neihah hian state hrang hrangah hna hrang hrang thawkte interview an ni a, an zinga 96% chuan PM programme hi an lo hriat thu an sawi.

Kum 2014, October 3 aṭanga PM-in radio show a neih hi thla tin Pathianni hnuhnung berah neih ṭhin niin, tun thla hian episode 100-na tihchhuah a ni ang.

Zirchianna an neihah hian ram chhunga mi vbc 23 dawn chuan programme hi regular taka an ngaihthlak ṭhin thu sawiin, vbc 41 chuan a khat tawkin an ngaithla tih an sawi. A ngaithlatu zinga 65% chuan Hindi-a ngaithlain, 18% in English in an ngaithla bawk. Ngaithla ṭhin zinga 18.87% hi Class X chin hnuai lam niin, undergraduate 31.42% an awm. Graduate 13.20% awmin, ngaithlatu zingah hian post graduate 16.21% an awm. Radio programme a ni chungin an zinga 44.7% chuan TV aṭangin an en tih an sawi a, 37.6% in an mobile phone aṭanga enin, 17.6% in radio-ah an ngaithla. Kum 19-34 inkar zinga 62% chuan mobile phone aṭanga en/ngaithlak an thlan zawk laiin, kum 60 chunglam zinga 3.2% chuan TV aṭanga ngaihthlak an thlang thung.