PM Modi-a'n India rama water metro hmasa ber a hawng

Prime minister Narendra Modi chuan India rama water metro hmasa ber chu nimin khan Kerala-a Kochi-ah a hawng. He water metro hian Kochi khawpui leh a chhehvela thliarkar 10-te chu battery-operated electric hybrid boat hmangin a thlunzawm a ni.

Kochi Metro Rail Lt managing director chuan Kochi water metro project chu transport system thlak hmasawnna lantirtu pawimawh tak a ni tih sawiin, Kochi khawpui chu thliarkar tam takin a hual a, heng zingah 10-te chu hmun pawimawh leh mipui chen tamna a ni tih a sawi.

Kerala chief minister Pinarayi Vijayan chuan water metro hian water transportation lamah danglamna nasa tak thlentu tur leh, an state tourism thlenga tihlawktu tur a nih thu a sawi.

Kochi water metro hi state sorkar leh Germany firm, KfW-te bultuma siam niin, lawng hi Cochin Shipyard Limited siam a ni. He project senso atan hian Rs vbc 747 ruahman niin, electric boat 78 leh terminal 38 a awm. Water metro hmang hian thliarkar 10-te chu thlunzawm an ni dawn a, a thawh khatna atan High Court-Vypin terminal leh Vyttila-Kakkanad terminal inkarah service tir a ni. Ticket hi online hmanga book niin, Rs 20 aṭanga Rs 40 inkar a ni.