Sudan aṭangin India mi 534 hruai chhuak tawh

Sorkar laipuiin tualchhung indona thlen mekna, Sudan rama India mi tangkhangte hruai chhuah hna, Operation Kaveri a kalpuina hnuaiha sipai thlawhtheihna leh lawng hmangin Sudan aṭangin India mi 534 hruai chhuah an ni bawk. Midang pawh hruai chhuah chhunzawm zel an ni ang.

Sudan-a darkar 78 inkahhai puan a nih chhungin ram hrang hrangte chuan an mi leh sate thiar chhuah hna hi an thawk hlawm a ni. Thawhlehni khan India pawhin Operation Kaveri hi kalpui ṭanin, Port Sudan aṭangin a thawh khatna atan navy lawng, INS Sumedha hmangin India mi 279 chu hruai chhuah a ni. Indian Air Force (IAF) medium-lift transport aircraft, C-130J hmangin ṭum hnih, mi 121 leh 135-te chu Port Sudan aṭangin Jeddah, Saudi Arabia-ah hruai an ni tawh bawk. India chuan Jeddah-ah hian Pathianni khan hruai chhuah hna thawk turin C-130J aircraft pahnih hi a chhawp.

India mite hruai chhuah hna thawh enpui tur hian minister of state for external affairs V Muraleedharan chuan Thawhlehni khan Saudi port city, Jeddah hi a thleng. Jeddah aṭanga India rama hruai haw hna pawh ṭan a ni thuai dawn tih a sawi.

Sudan tualchhung indona thleng mekah an ram khawpui, Khartoum-a airport chu inbeihnaah an tihchhiat tel avangin khawpui aṭanga inhruai chhuah kawngah harsatna a awm chho tih an sawi. Thuneitute chuan Khartoum bakah hmun danga India mi tangkhangte hruai chhuah dan kawng hrang hrang an dap a, Khartoum khaw bula military airbase hman theih dan tur pawh an dap mek a ni.

Sudan aṭanga Jeddah-a hruaite tan hian India chuan control room leh transit facility pawh a din a, ei tur, medical facility, khum te dahin, heng hmunah hian India rama hruai haw an nih hma chu an awm ang.