Congress-in RTI-in PM CARES Fund a huam loh chhan zawt

Congress party chuan PM CARES Fund-a sum chetvel dan langtlang taka kalpui a ni lo leh, he fund-a sum lut 60% chu public sector undertaking (PSU) aṭanga lut anih laia public audit leh Right to Information (RTI) Act in a huam ve loh chhan an zawt.

All India Congress Committee (AICC) headquarters-a press conference an neihah, party senior spokesperson Abhishek Singhvi chuan public fund, mipui sum thawh tling khawm aṭanga Rs vbc 5,000 chuang zet luhna chu RTI in a huam a, sum chetvel dan pawh an tihlan a ngai a ni, a ti. "PM CARES Fund chungchanga rinrhlelhna leh sawi tam tak awm hian, ngaihtuah zui tak tak loin sorkar, prime minister leh rorellai party-ten an din tih a tichiang hle a ni," a ti.

PM CARES Fund-a sum lut zinga 60% chu sorkar enkawl leh sorkar hnuaia firm-te aṭanga lut a ni tiin, heng zingah hian ONGC, NTP leh IOC pawh an tel a ni, tiin a sawi. PM CARES Fund chu trust a ni a, din anih aṭanga kum ruk hnuah pawh sorkar chuan sum hman dan kimchang report a siam lo tiin a chhan zawt zui bawk. "Pawisa te chu khawiah nge hman a nih a, khawvel hriatah fund hman a nih dante chu engatinge in hrilh loh? Sumte hi pawhpen anih chuan sum thawhtute tan thil nuihzathlak a ni dawn hauh lo. Chhanna kan duh a ni," tiin Singhvi chuan a sawi.

April 24 khan Congress party president Mallikarjun Kharge chuan PM CARES Fund enfiah a ni tawk lo chu a lo sawisel tawh bawk.