China defence minister a rawn zin dawn

China defence minister general Li Shangfu chu Shanghai Cooperation Organisation (SCO) defence ministers meeting hmang turin vawiin hian India ramah a rawn zin dawn.

China president Xi Jinping nena inhnimhnai tak nia sawi, Gen Li-a'n India ram a tlawh tur hi thil chhinchhiah tlak tak nia sawi a ni. A cham chhung hian defence minister Rajnath Singh nen inkawmin, Eastern Ladakh ramria ram pahnih sipaite buai leh inepna boruak awm reng tihtawp dan turte an sawidun rin a ni.

India leh China hian ramria sipaite buaina chinfel dan ngaihtuah hian ṭum eng emaw zat inbiakna pawh an lo nei tawh a, April 23 khan China-India Corps Commander Level Meeting vawi 18-na chu China ram lam, Chushul-Modol border meeting point-ah neih a ni. Ram pahnih aiawhte hian Eastern Ladakh bakah, border area-a boruak muanawm a awm theihna atana an buaina neihte a rang thei anga chinfel dan ngaihtuah an remtih thu an sawi.