Delhi Mayor atan AAP candidate Shelly Oberoi thlang
Municipal Corporation of Delhi (MCD)-a rorellai, Aam Aadmi Party (AAP) candidate Shelly Oberoi chu nimin khan Delhi mayor atan thlan nawn leh a ni.
Delhi Mayor thlannaah hian BJP candidate Shika Rai chu a inhnuhdawh leh tak avangin, Shelly Oberoi hi chuhtu awm loa thlan tlin a ni ta a ni. AAP member Mohammad Iqbal pawh BJP candidate a inhnuhdawh vangin chuh tu dang awm loin deputy mayor atan thlan a ni bawk.
Shelly Oberoi hi Delhi Mayor a nih ṭum hnihna tur a ni. Kumin February thla khan BJP leh AAP inbeihna nasa tak karah mayor atan hian thlan niin, BJP candidate Rekha Gupta chu vote 34 in a hneh. Hemi ṭum hian vote 266 tlain, Oberoi hian vote 150 a hmu a, Gupta hian vote 116 a hmu.
Oberoi hi Delhi University-a visiting assistant professor hlui niin, tun ṭum hi councillor term khat a chelhna tur a ni. MCD inthlanah khan East Patel Nagar ward-ah thlan tlin a ni.
Delhi Mayor term hi kum nga a ni a, term khat chhung hian mayor hi an inchelh chhawk ṭhin. A kum khatna chu hmeichhe puala dah niin, a kum hnihna open category, a kum thumna reserved category leh, a kum lina leh kum ngana chu open category tan dah a ni ṭhin.