A thusawi dan avangin Amit Shah lakah complaint theh lut

Assembly inthlan hmabak, Karnataka-a April 25-a rally neihnaah union home minister leh BJP hruaitu, Amit Shah chu eptu pawlte huatna leh enhranna chawk tho thei zawnga thu sawiah puhin a lakah police complaint thehluh a ni.

Bengaluru-a High Ground police station-ah Congress party hruaitu Randeep Singh Surjeawla, Dr Parmeshwar leh Karnakta Congress chief DK Shivakumar-te chuan complaint hi thehlutin, Amit Shah bakah BJP hruaitu dangte hming pawh an ziak lang.

Police-a complaint an thehluhah hian Belagavi district-a rally neihnaa Amit Shah thusawi chu tarlangin, "Union Home Minister chuan Congress party-in sorkarna an siam chuan tualchhungah intualvuakna a thleng ang tiin a sawi. Eng vanga hetianga sawi hi nge a nih?" tiin Dr Shivakkumar chuan a zawt a, Election Commission of India-ah pawh an thlen tur thu a sawi. Amit Shah thusawi chu Karnataka mipui vaibelchhe 6.5-te hmuhsitna lantirna a ni, an ti.

Complaint-ah hian Amit Shah bakah, April 25-a Vujaypura leh Karnataka state chhung hmun danga rally huaihawttute leh state BJP hruaitute ṭhenkhatte hming tarlan a ni bawk.

"Amit Shah hian thu dik lo tak hmanga Indian National Congress hmel tichhe thei tura thu a sawi mai hian mi a ṭhawng hle. A thusawi hi mipui pungkhawmte hnenah inhuatna boruak thlentir a tumna ngei a ni," tiin complaint-ah hian an tarlang. Video link pawh an thehlut tel nghal bawk.

Congress general secretary in-charge Communications Jairam Ramesh chuan Amit Shah thusawi duh dan chu thil zahthlak tak a nih thu sawiin, election campaign-naah invauna thu sawiah a puh.

Karnataka state assembly inthlan hi May 10 hian neih a ni dawn a, Amit Shah hi BJP star campaigner niin, rally a nei fo a ni. Inthlan hi thawh khata neih a ni dawn a, May 13-ah result puan a ni ang. Assembly seat 224 awmna, Karnataka legislative assembly inthlan neih turah hian candidate 2,613 awmin, an zingah hian mipa 2,427 leh hmeichhia 184 bakah, others tia indah mi pahnih an awm.