Gujarat High Court-in Rahul Gandhi appeal-na ngaihtuah dawn

Congress party hruaitu, Rahul Gandhi-a'n 'Modi surname' chungchang a sawi avanga defamation case-a thiam loh chantir a nihna 'stay' tura a ngenna chu vawiin hian Gujarat High Court chuan a ngaihtuah dawn.

Surat sessions court-a thiam loh chantir a nihna stay tura a ngenna hnawlsak a nih hnuah, Gandhi hian High Court-ah a appeal leh a ni. Vawiin hian justice Hemant Prachchhak chuan a ngenna hi a ngaihtuah ang.

March 23 khan Surat-a metropolitan magistrate court chuan Congress party president hlui hi kum 2019-a election rally-a a thusawi chungchanga BJP Gujarat MLA Purnesh Modi-a'n defamation case a thehluhah thiam loh a chantir a, kum hnih lungin tang turin a hrem a ni. Court-in hremna a tihchhuah hnuah, Gandhi hi Representation of the People Act hnuaiah Parliament member a nihna hlihsak nghal a ni bawk. Court-in thiam loh a chantirna hi stay a nih chuan MP-ah hian dah let leh theih a ni dawn a ni.

Rahul Gandhi hian kum 2019, April 13-a Kolar, Karnataka-a election rally a neih ṭuma thu a sawinaah, "Engtin nge rukru zawng zawng hian an surname-ah Modi tih an neih theih vek zawk?", tiin a sawi. A thusawi avang hian Gujarat BJP MLA, Purnesh Modi chuan Gandhi lakah hian defamation case a thehlut a ni. Surat metropolitan magistrate court chuan Gandhi hi a thubuaiah hian thiam loh a chantir hnuah, bail a dilna hi a phalsak a, mahse a appeal-na erawh a hnawlsak thung.