Hri kai thar mi 7,533 leh thihpui mi 44 an awm

India rama Covid-19 hri kai thar hmuh chhuah chuan ziaawm lam a pan leh ṭan. Ni khatah hri kai thar mi 10,000 chuangte an awm chhoh hnuah, Ningani khan hri kai hmuh chhuah thar hi 7,533-ah an tla thla.

Union health ministry-in a tarlan danin, hri kai tharte nen ram pumah Covid-19 hri kai hmuh chhuah tawh hi vaibelchhe 4.49 an awm tawh a; hri kai mek, activ case chu mi 53,852-ah a tlahniam tawh bawk. Active case hi hri kai tawh aṭanga 0.12% an ni.

Ningani khan hripui vanga thi mi 44 awm belh lehin, India ramah Covid-19 hri thihpui hi mi 5,31,468 an tling tawh a, hri kai aṭanga 1.18% an ni. Hetih lai hian hri kai enkawl dam, recovery rate hi 98.69% a ni thung.

Ram pumah Covid vaccine hi dose vbc 220.66 pek chhuah a ni tawh bawk.

Delhi khawpui bikah Ningani khan hri kai thar mi 865 awmin, thihpui mi pasarih an awm. Delhi-ah hian daily positivity rate hi 16,90% a la ni a, hri kai hmuh chhuah tawh hi mi 20,37,061awmin thihpui mi 26,620 an awm tawh a ni. Covid-19 hri a len hnuah kumin January 16 khan Delhi-ah hian a ṭum khatna atan hri kai mek an awm lo a, mahse thla hmasa aṭang khan hri kai hi an pung leh nasa tawh hle a ni.