PM Modi-a'n Mann Ki Baat vawi 100-na hmang

Prime minister Narendra Modi chuan thla tina radio programme a neih ṭhin, Mann Ki Baat vawi 100-na chu nimin khan a hmang.

Mann Ki Baat vawi 100-naah hian a hmaa a hun hmana an hming a lo sawilan tawh ṭhenkhatte chu PM Modi hian bia in, an hnathawh leh an hmasawn dante a lo sawipui a ni. Nimina PM-in a programme hman laia a biakte chu - lotus fibre aṭanga thawmhnaw siamtu, Manipur mi Vijayashanti Devi; 'selfie with daughter' campaign kalpuitu Sunil Jaglan; 'Healing Himalayas' campaign siamtu Pradeep Sangwan leh Jammu and Kashmir-a thingtlang khuaa pencils manufacturing unit siam a, mi 200 tana hna petu Manzoor Ahmed-te an ni.

'Mann Ki Baat' chu India mi vaibelchhe telte hlimthla, an ngaihtuahna an sawichhuahna a ni tiin PM chuan nimina a programme hi bul a ṭan a, he programme a hlawhtlinna chu mipuite a ni tiin lawmthu a sawi nghal bawk.

Prime Minister chuan Mann Ki Baat-ah hian ramchhunga field hrang hranga mi hlawhtling leh talent nei ṭha chanchinte tarlan a ni tih sawiin, Aatmanirbhar Bharat aṭanga Make in India bakah space startups chawilarna a nih thu a sawi. He programme hian mipuite nena inzawmna ṭha pein, a tan chuan programme pangngai ringawt ni loin, spiritual journey a ni, a ti.

Mann Ki Baat hi central-a BJP kaihhruaiin sorkarna an chan hnu lawk, kum 2014 October 3 aṭang khan PM hian hmang ṭanin, thla tin Pathianni hnuhnung berah hman a ni ṭhin. All India Radio (AIR) leh Doordarshan (DD) network-ah chawhma dar 11-ah tihchhuah a ni ṭhin.

Mann Ki Baat episode 100-na pual hian BJP sorkarna state-te chuan a lawmna hrang hrang siam an tum. Tourism Ministry chuan '100 days of action' siamin, entrepreneur-te tan single-use plastic thlakna tur chawilarna design challenge te a buatsaih.

Nimina Mann Ki Baat episode 100-na hi New York-a United Nations headquarters-ah pawh tihchhuah a ni. Ram hrang hrangah Indian diplomatic mission-ahte tihchhuah ni bawkin, heng hmunah hian embassy official-te leh India mi awmte chuan a huhoin an ngaithla a ni.