Sudan aṭangin India mi 1,954 hruai haw tawh

Sorkar laipui chuan Sudan rama tualchhung indona thleng mek avangin India mi awmte hruai chhuah hna, Operation Kaveri chu a kalpui chhunzawm zel. Sudan aṭang hian mi 1,954 chu India rama hruai haw an ni tawh.

Sudan aṭanga hruai chhuah turte hi Saudi Arabia-a Jeddah hmun panpui phawt niin, heta ṭang hian India ram hruai haw a ni. Jeddah-ah hian sorkar chuan transit camp a siam a ni. A thawh hmasa berah April 26 khan mi 360 chu commercial plane hmangin New Delhi-ah hruai haw an ni a, April 27-ah a thawh hnihna atan Indian Air Force (IAF) C17 Globemaster aircraft hmangin Mumbai-ah mi 246 hruai haw an ni leh bawk. April 28-ah thawh hnihin mi 754 phurh haw an ni bawk.

Operation Kaveri hnuaiah hian Sudan ram, a bikin an khawpui Khartoum leh buaina chhuahna hmun danga awmte chu bus-in Port Sudan-ah phurh an ni a, heta ṭang hian IAF thlawhtheihna leh Indian Navy lawng hmangin Jeddah-ah hruai an ni. Jeddah aṭang hian IAF aircraft leh commercial flight hmangin India rama hruai an ni.

Jeddah leh Port Sudan-ah hian control room siam ve vein, Khartoum-a Indian embassy nen an inbepawp reng a, hei bakah ministry of external affairs (MEA) chuan operation kalpui dan hi a thlithlai reng bawk.

Sudan army leh paramilitary group-te thuneihna inchuha an indo avangin Sudan ramah hian mi 400 chuang an thi tawh a ni. Tualchhung indona hian ziaawm lam a pan mai loh avangin ram hrang hrangte chuan Sudan-a an mi leh sa awmte thiar chhuah hna an kalpui mek. India pawhin April 24 khan India mi tangkhangte hruai chhuak turin 'Operation Kaveri' kalpui a nih tur thu hi a puang a ni.