Missionary-ten Kristian sakhaw rin dan an thehdarh hi dan kalh a ni lo : Tamil Nadu

Tamil Nadu sorkar chuan mitinin an sakhaw rin dan leh zirtirnate chu boruak muanawm leh ṭha tak hnuaiah an thehdarh thei a, missionary-ten Kristian sakhaw rin dan an thehdarh dan chu dan kalh a ni lo, tiin Supreme Court a hrilh.

Tamil Nadu-a Dravida Munnetra Kazhangam (DMK) kaihhruai sorkar-in Supreme Court-ah affidavit a thehluhah, sakhaw inleh khapna, anti-conversion law chu sakhaw tlem zawkte chungah dik lo taka hman theihna a tam hle tih a sawi. Ram mipuite chu an sakhaw duh ber an zawm phalsak tur a ni tiin, sorkarin an mimal nun leh rindan a lo sawi sak chu thil tihawm a ni lo tih a sawi bawk.

Advocate Ashwini Upadhayay-a'n Supreme Court-a petition a thehluhah, tihluihna hmanga sakhaw inlehtirna a thlen ṭhin thu a sawi leh, law commission of India chu anti-conversion law duang tura ngenna a siam chu Tamil Nadu sorkar hian chhangin, an state-ah kum tam tak chhung tihluihna hmanga sakhaw inlehtir an awm lo tih a sawi. Upadhyay chu a petition thehluhah Kristian missionary-te bitumah puhin a sawisel zui bawk a ni.

Tamil Nadu sorkar chuan, "India Constitution-a Article 25 chuan ram mipui tinte chu an sakhaw rin dan thehdarh turin dikna chanvo a pe vek a ni. Missionary-ten Kristian sakhaw rin dan an thehdarh ringawt hi dan bawhchhiatna ani lo. Mahse Constitution Part III, fundamental rights kaihhnawih bawhchhia an ti a nih chuan thil dik lo tak a ni ang. Tamil Nadu-ah chuan kum tam tak chhung sakhaw inlehluhtirna a thleng lo," tiin a sawi.

Upadhyaya-a'n a petition thehluhah, Tamil Nadu-a hmeichhe tleirawl Lavanya a lehkha zirna Kristian institution-in a sakhua an leh luihtir avanga a intihlum nia a sawi pawh thu dik lo a nih thu Tamil Nadu sorkar affidavit thehluah hian tarlan a ni bawk. "Lavanya thih dan hi central bureau of investigation (CBI) in a chhui mek a, state police chuan chhui zo tawhin Kristian sakhuaa inlehtir a nih avanga intihlum a ni tih finfiahna engmah a awm lo," a ti. Tamil Nadu sorkar hian PIL thehluttu, Upadhyay chu BJP mi leh sa a ni a, court rorelna chu politics lama inbeihna atana hman a tum tiin, a PIL thehluh chu hnawlsak turin Surpeme Court a ngen bawk.