India leh Russia-in RuPay leh Mir card inpawmsak dan ngaihtuah

Russia-in Ukraine ram a run avanga khawthlang ramten kawng hrang hranga Russia an hrek mek karah, India chuan Russia nena pawisa inpawmtawn sak a, awlsam zawka payment tih theihna turin Rupay (India) leh Mir card (Russia) inpawmsak dan kawng an ngaihtuah mek.

Tun hnaiah Trade, Economic, Scientific, Technological and Cultural Cooperation (IRIGC-TEC) chungchanga high-level internal governmental commission meeting neihah, heng card pahnihte inpawmsak dan ngaihtuah an remti a ni.

Rupay leh Mir card-te hi in pawmsak chuan, ram pahnihah hian Indian Rupees leh Russian ruble hmangin India leh Russia mi leh sate chuan awlsam takin payment an ti thei dawn a ni.

Meeting hi external affairs minister S Jaishankar leh Russia deputy prime minister Denis Manturov-ten an kaihruai a, National Payment Corporation of India-a Unifed Payments Interface (UPI) leh Bank of Russia-a Faster Payments System (FPS) thawhdun theih dan pawh ngaihtuah an remti bawk.

Tun hnaiah prime minister Narendra Modi leh Singapore prime minister Lee Hsien Loong-te chuan UPI leh Singapore PayNow-te inhmantawn theihna tur an lo hawng tawh bawk a ni. UPI-PayNow link hian ram pahniha chengte chu ditigal transfer rang zawkin a tihtir theih phah a ni.