NCP President a nihna aṭangin Sharad Pawar a bang

Sharad Pawar chuan nimin khan National Congress Party (NCP) president a nihna aṭanga a ban thu a puang.

Nimina Mumbai-a party worker-te nena inhmuhkhawmnaah, veteran politician Sharad Pawar chuan NCP hotu a nihna aṭanga a ban thu hi a puang a, mahse politics chawlhsan erawh a la tum lo tih a sawi nghal bawk.

"Party president aṭangin bang mah ila, ram rawngbawl hna ka thawhna aṭang chuan ka la chawl dawn lo. Public event leh meeting-ahte pawh ka la tel zel dawn. Pune, Mumbai, Baramati, Delhi emaw, ramchhung hmun dang khawiah pawh awm mah ila, a hma ang bawkin in tan ka la awm chhunzawm reng dawn a ni," tiin NCP worker-te a hrilh.

Pawar hian party hotu aṭanga a ban thu hi Mumbai-a Yashwantrao Chavan Pratisthan-a a autobiography tlangzarhnaah a puang a, NCP worker leh hruaitute chuan a thutlukna hi an lo hnialsak thung.

Thuchhuah a siamah, Pawar chuan, "Parliament-a Rajya Sabha member ka nih meknaah kum thum hun ka la nei. Hemi chhung hian Maharashtra leh India kaihhnawih thil bikahte ka insawrbing ang. Hun rei tak, May 1,1960 aṭanga May 1, 2023 chhung vantlang tana rawng ka bawl hnuah, chawlh hi a ṭul tawh a ni," tiin NCP President a nihna aṭanga a ban a tum chhan a sawi.

Pawar hian amah thlaktu tur a sawilang lo a, party hotu ruat tur committee din a ni dawn tih a sawi. Committee member-ah Pawar-a fanu Supriya Sule leh a tupa Ajit Pawar-te bakah, Praful Patel, Jayant Patil, Anil Deshmukh, Rajesh Tope, Chhagan Bhujal bakah midang ṭhenkhat ruat an ni ang.

Sharad Pawar hi NCP dintu zinga mi a ni. Kum 1999 khan Pawar, PA Sangma leh Tariq Anwar-te chuan Indian National Congress (INC) aṭanga hnawhchhuah an nih hnuah NCP hi an din a ni. Pawar hi Maharashtra chief minister atan vawi li thlan a ni tawh a, union defence leh agriculture minister a ni tawh bawk. Kum 2019-a Maharashtra assembly inthlan nei hnuah NCP, Congress leh Shiv Sena-ten ṭangrual sorkar, Maha Vikas Aghadi (MVA) sorkar an dinna kawnga a sulsutu ber a ni bawk.