Pawikhawihna thleng 90% hi hmun dang aṭanga rawn lutte vang : Goa CM

Goa chief minister Pramod Sawant chuan an state-a pawikhawihna thleng 90% chu state pawn lam, Bihar, Uttar Pradesh leh hmun dang aṭanga hna thawk tura an state-a lutte thlen an ni tih sawiin, contractor-te chu hnathawk an chhawr turte hnen aṭanga labour card la zel turin a ti.

Chief Minister chuan state danga inhlawhfa tura an state-a lutte chuan state sorkar hnen aṭangin labour card an la zel tur a ni, tiin a sawi.

Goa sorkar hian private, unorganised leh industrial sector-a thawkte hnenah labour card hi a pe chhuak ṭhin. Inhlawhfaa awmte hian card an nei vek em tih enfiah tur hian state sorkar chuan NGO pahnih a thawhpui a ni.

CM chuan Goa-a inhlawhfaa awmte chu pawi an khawih hnuah an state lamah an haw leh ṭhin a, hei vang hian chhuizui a harsa hle ṭhin a ni tiin, hnathawka chhawrte chanchin kimchang chhuizui theih chu thil ṭul a ni, a ti. Labour card hi an neih vek chuan awlsam takin chhuizui theih an ni dawn tih a sawi.