Gujarat High Court-in Rahul Gandhi ngenna pawmsak thei rih lo

Gujarat High Court chuan Congress party hruaitu, Rahul Gandhi-a'n 'Modi surname' chungchanga a sawi avanga Surat court-in thiam loh a chantirna 'stay' tura petition a thehluh chu, tun maiah chuan a ngaihtauhsak thei lo tih a sawi. Summer vacation zawhah court chuan thutlukna a siam dawn chauh a ni.

Nimin khan Gandhi ngenna thehluh chungchang hi ngaihtuah a ni a, Gandhi-a lawyer Abhishek Manu Singhvi chuan 'extreme urgency'-a dah a, ngaihtuah sak nghal turin court chu a ngen. Mahse justice Hemant Parchchhak court chuan Gandhi hremna lo 'stay lailawk' theih a ni rih lo tih a sawi. Record hrang hrangte an enfiah hnuah final order hi summer vacation zawhah High Court hawn leh veleh an tihchhuah tur thu a sawi. Summer vacation hi May 8 - June 3 chhung an nei ang.

Rahul Gandhi hi kum 2019, April 13-a Kolar, Karnataka-a election rally-a 'Modi surname' chungchanga a thusawi avangin a lakah BJP MLA Purnesh Modi chuan criminal defamation case thehlutin, he thubuaiah hian March 23 khan Surat court chuan thiam loh a chantir a, kum hnih jail tang turin a hrem bawk. Kum hnih tang tura hrem a nih avang hian Rahul Gandhi hi Parliament member a nihna hlihsak a ni zui bawk.

Parliament member-te hian an thubuaiah thiam loh chantir a, kum hnih emaw a aia tam emaw tang tura hremna pek an nih chuan MP an nihna hlihsak theih an ni a, an bial pawh bial ruakah puan nghal a ni ṭhin. Mahse thiam loh chantir an nihna hi court-in a 'stay' sak chuan, Parliamment member-ah dah let theih an ni ang.

Gandhi hian thiam loh chantir a nihna hi Surat sessions court-ah a appeal a, mahse court hian a ngenna hi a hnawlsak. Hemi hnu hian Gujarat High Court-ah petition a thehlut leh a, mahse High Court pawhin a ngenna ngaihtuah hun tur hi a tikhawtlai ta a ni. Kar liam ta Nilaini khan Gujarat High Court judge, justice Gita Gopi chuan Gandhi case hi a ngaihtuah thei rih lo tih a sawi a, justice Prachchhak kutah hlan a ni ta a ni.