Wresting federation hotuin wrestler-te puhna pha PM Modi-a duhdan a nih chuan ban a inhuam

Wrestler ṭhenkhatte nen mipat hmeichhiat lam hawia mawi lo taka an chunga chea an puhna chu wrestling federation hotu leh BJP MP, Brij Bhusan Sharan Singh chuan thu dik lo a nih thu a sawi. Hemi rual hian prime minister Narendra Modi emaw, BJP hruaitu dang emawin a nihna aṭanga bang tura an tih chuan banna a thehluh nghal mai tur thu a sawi.

India rama wrestler ṭhenkhat chu kar khat chhung Delhi-a Jantar Mantar-ah Brij Bhusan Sharan Singh lakah hian lungawi lohna an lantir tawh. An zingah hian ramchhunga wrestler lar - Vinesh Phogat, Sakshi Malik leh Baijrang Punia-te pawh an tel. Singh hian wrestler eng emaw zat, kum tlinglo pakhat pawh telin, chungah mipat hmeichhiat lam hawia mawi lo taka cheah puhin, hremna pek hi an phut.

Delhi Police chuan Singh lakah hian thubuai pahnih ziak lut tawhin, pakhat zawt hi kum tling lo pakhatin complaint a thehluh behchhanin Protection of Children from Sexual Offences (POCSO) Act hnuaiah ziahluh a ni.

Eptu pawl hrang hrang hruaitute chuan nawrh huaihawt mek wrestler-te chu an thlawp thu sawiin, dik lo taka thiltitu BJP MP Singh chu BJP hruaitute chuan an hum tlat niin an puh a, PM Modi chu Singh hi ban turin an phut.

Hetih lai hian Uttar Pradesh BJP MP, Singh hian an puhnate hi thu dik lo a nih thu leh, politics lama a dinhmun tihchhiat tuma an phiarrukna zawk niin a puh.