Nawrh huaihawt mek wrestler leh Delhi police-te innawr buai
Delhi police-te chuan Jantar Mantar, New Delhi-a nawrh huaihawt mek, hmeichhe wrestler-te chu Nilaini zan khan an innawr buai.
Wrestling federation hotu leh BJP MP, Brij Bhusan Sharan Singh chuan mipat hmeichhiat lam hawia hmeichhe wrestler ṭhenkhat chunga mawi lo taka chea puhin, wrestler-te chuan a chunga action lak phutin Jantar Mantar-ah kar khat chuang nawrh an huaihawt tawh a ni.
Nilaini zan khan Jantar Mantar-ah wrestler ṭhenkhat leh police-te an innawr buai a, hei vang hian buaina nasa zawk a chhuah venthawn thilah Jantar Mantar-ah wrestler thlawptute an punkhawm belh venna turin daidanna an siam a ni.
Police-te nena an innawr buainaah wrestler ṭhenkhat chuan hliam an tuar a, award-winning wrestler Duhsyant Phogat pawhin a lu ah a hliam a ni. Police-te hian wrestler-te thlawpna lantir tura kal, Delhi Commisison for Women (DCW) chairperson Swati Maliwal leh Rajya Sabha MP Deepender Hooda chu an hreng zui bawk.
Wrestler-te chuan Delhi police-te chet dan chu an dem thu sawiin, Vinesh Phogat leh Bajrang Punia-te chuan medal leh award an lo dawn tawhte chu sorkara pek let vek a inhuam thu an sawi. Olympic bronze medalist Bajrang chuan, "Hei hi wrestler-te chunga an chet duh dan a nih chuan kan medal lo dawn ve tawhte hi engatan nge kan tih ang? Hetianga hmusit taka en kan nih ai chuan kan medal leh award-te chu sorkar hnenah pek let a, nunphung pangngaia nun kan thlang zawk a ni," a ti. Police-te chuan Padma Shri awardee an ni tih pawh hriatpui duh loin, an laka kut an thawh bakah ṭawngkam chhe tak tak an hman khum tih a sawi.
Khel Ratna awardee Vinesh Phogat pawhin, "Kan medal-te hi la ve rawh u. Nasa taka hmuhsit kan ni. Kan zahawmna atan kan bei a, mahse engahmah min ngai lo," a ti. Rorelna dik an hmuh theihna turin an medal bakah nunna hial pawh chan an huam thu a sawi a ni.
Eptu party-te chuan wrestler nawrh huaihawt mekte an thlawp thu leh, an chunga thuneitute chet dan an dem thu an sawi. Congress hruaitu Rahul Gandhi chuan hmeichhe wrestler-te chunga kutthlak an ni chu thil zahthlak tak a nih thu sawiin, BJP chu India ram fanute laka kut thawh hreh loah a puh. Aam Aadmi Party (AAP) hruaitu Arvind Kejriwal pawhin BJP chu mipuite chunga tawrawt taka cheah puhin, an thuneihna aṭanga paihthla turin ram mipuite a sawm nghal bawk.