PM Modi documentary chungchangah Delhi Court-in BBC, Wikipedia leh Internet Archive ko

BBC-in prime minister Narendra Modi documentary, ‘India: The Modi Question’ a siam chungchanga BJP hruaitu Binay Kumar Singh-a'n defamation case a thehluh kaihhnawihah, Delhi court chuan BBC, Wikipedia leh Internet Archives-te chu thu zawhfiah turin a ko.

Additional district judge (ADJ) Ruchika Singla chuan thu zawhfiah tura kohna hi a tichhuak a ni.

Jharkhand BJP state executive committee member, Kumar chuan defamation case a thehluhah hian, BBC documentary siam hian BJP bakah Rashtriya Swayamsevak Sangh (RSS) leh Vishwa Hindu Parishad (VHP) thlengin an hming a tihchhiatsak niin a puh. "RSS leh VHP an tarlan dan hi heng pawl pahnih leh an member/volunteer mi maktaduai telte hming tihchhiat tumna a ni. Hetianga dik lo taka inpuhna hian India hnam zia rang, vantlang nunhona chawinun tumtu pawlte hmel a tibal a ni," a ti. Hei bakah hian kum 2002-a Gujarat intualvuakna thleng chungchangah prime minister Narendra Modi chu mawhphurtua puhna chu finfiahna awm lo leh, intihmingchhiat tumna a nih thu a sawi bawk.

Kumar chuan BBC documentary series pahnihte hi tihchhuah a nih tawh lohna tura he thila inhnamhnawih zawng zawngte lakah khapna thupek tichhuak turin a ngen bawk a ni.